(فوٹو اے آئی)
جموں کشمیر کے فاسٹ بولر عاقب نبی کو پہلی بار بھارتی ٹیسٹ ٹیم میں شامل کر لیا گیا ہے۔ جسپریت بمرا انجری کے باعث سری لنکا کے خلاف دو ٹیسٹ میچوں کی سیریز سے باہر ہو گئے ہیں۔
جموں کشمیر سے تعلق رکھنے والے 29 سالہ فاسٹ بولر عاقب نبی کو پہلی مرتبہ ہندوستانی ٹیسٹ ٹیم میں شامل کر لیا گیا ہے۔ انہ- سری لنکا کے خلاف دو ٹیسٹ میچوں کی سیریز کے لیے زخمی فاسٹ بولر جسپریت بمراہ کے متبادل کے طور پر منتخب کیا گیا ہے۔
بی سی سی آئی (BCCI) کے مطابق جسپریت بمرا گزشتہ ماہ انگلینڈ کے خلاف ون ڈے سیریز کے دوران بائیں گھٹنے کی انجری کا شکار ہوئے تھے اور مکمل فٹنس حاصل نہ کر پانے کے باعث سری لنکا کے خلاف سیریز سے باہر ہو گئے ہیں۔
عاقب نبی نے گزشتہ دو رنجی ٹرافی سیزنز میں شاندار بولنگ کا مظاہرہ کرتے ہوئے مجموعی طور پر 104 وکٹیں حاصل کیں۔ صرف پچھلے سیزن میں انہوں نے 60 وکٹیں لے کر جموں کشمیر کو تاریخ میں پہلی مرتبہ رنجی ٹرافی کا ٹائٹل جتوانے میں اہم کردار ادا کیا۔
ان کی مسلسل عمدہ کارکردگی کے باعث انہیں حال ہی میں انڈیا اے ٹیم کے ساتھ سری لنکا کے دورے پر بھی بھیجا گیاتھا، جہاں انہوں نے دو چار روزہ میچوں میں چھ وکٹیں حاصل کیں، جن میں پہلے میچ کی پہلی اننگز میں 58 رن کے بدلے چار وکٹیں نمایاں رہیں۔
دوسری جانب جسپریت بمرا کی ٹیسٹ کرکٹ میں واپسی مزید مؤخر ہو گئی ہے ۔ وہ گزشتہ سال آسٹریلیا میں بارڈر۔ گواسکر ٹرافی کے دوران کمر کی انجری سے واپسی کے بعد محدود ورک لوڈ کے تحت کھیل رہے تھے، جبکہ انگلینڈ کے خلاف پانچ میں سے صرف تین ٹیسٹ میچوں میں شرکت کی تھی۔
سری لنکا کے خلاف ٹیم انڈیا کی قیادت شبھمن گل کریں گے جبکہ کے ایل راہل نائب کپتان ہوں گے ۔ سائی سدرشن کی ٹیم میں شمولیت بھی فٹنس کلیئرنس سے مشروط رکھی گئی ہے۔
ٹیسٹ اسکواڈ
شبھمن گل (کپتان)، کے ایل راہل (نائب کپتان)، یشسوی جیسوال، رشبھ پنت (وکٹ کیپر)، سائی سدرشن، دھرو جوریل (وکٹ کیپر)، رویندر جڈیجا، کلدیپ یادو، مناَو سوتھر، محمد سراج، پرسدھ کرشنا، گرنور برار، دیودت پڈیکل، سرانش جین اور عاقب نبی۔
