(فوٹو اے پی)
مراکش نے فیفا عالمی کپ کے پری کوارٹرفائنل کے لیے کوالیفائی کرلیا ہے۔جہاں اس کا مقابلہ کینیڈا سے ہوگا۔
مراکش نے فیفا عالمی کپ کے پری کوارٹرفائنل کے لیے کوالیفائی کرلیا ہے ۔ مقررہ 90 منٹ اور پھر اضافی وقت کے اختتام پر نیدرلینڈزسےمقابلہ 1-1 سے برابر رہا۔ پنالٹی شوٹ آؤٹ میں نیدرلینڈز کو شکست دے کرمراکش فیفا ورلڈ کپ کے آخری 16 مرحلے میں رسائی حاصل کرلی ہے۔
مراکش(Morocco) کے گول کیپر یاسین بونو (Yassine Bounou)نے فیصلہ کن کردار ادا کرتے ہوئے نیدرلینڈز(Netherlands) کے کریسینسیو سمر ویل (Crysencio Summerville)کی چوتھی پنالٹی کک شاندار انداز میں روک لی۔ اس کے بعد اسٹرائیکر اسماعیل صائباری(Ismael Saibari ) نے اعتماد کے ساتھ فیصلہ کن پنالٹی گول کر کے اپنی ٹیم کو پنالٹی شوٹ آؤٹ میں 2-3 سے کامیابی دلائی۔
اس فتح کے ساتھ مراکش نے آخری 16 مرحلے میں جگہ بنا لی ہے، جہاں ہفتے کے روز ہیوسٹن میں اس کا مقابلہ کینیڈا سے ہوگا۔
دلچسپ مقابلہ اس وقت اضافی وقت میں داخل ہوا جب نیدرلینڈز فتح کے قریب تھا، مگر انجری ٹائم کے پہلے ہی منٹ میں عیسیٰ دیوپ(Issa Diop) نے ہیڈر کے ذریعے شاندار برابری کا گول کر دیا۔
اس سے قبل دوسرے ہاف کے وسط میں نیدرلینڈز نے برتری حاصل کی تھی، جب کوڈی گاکپو نے گول کیا۔
لیورپول سے تعلق رکھنے والے فارورڈ گاکپو گول کرنے کے بعد جذبات سے مغلوب ہو کر میدان پر بیٹھ گئے، جبکہ ان کے ساتھی کھلاڑیوں نے طویل اجتماعی انداز میں انہیں گلے لگا کر حوصلہ دیا۔
تاہم مراکش نے ہمت نہ ہاری اور انجری ٹائم میں متبادل کھلاڑی شمس الدین طالبی کے کراس پر بغیر کسی مارکنگ کے موجود عیسیٰ دیوپ نے ہیڈر کے ذریعے گول کر کے مقابلہ اضافی وقت میں پہنچا دیا۔
مقابلے کے دوران مراکش نے زیادہ خطرناک مواقع پیدا کیے، جبکہ دونوں ٹیموں کے کھلاڑیوں کے سخت ٹیکلز نے برازیلی ریفری ولٹن سامپائیو کے صبر کا بھی امتحان لیا۔نیدرلینڈز کے پاس گیند پر زیادہ کنٹرول رہا، مگر وہ اسے مؤثر حملوں میں تبدیل نہ کر سکا۔
دوسرے ہاف میں بھی مقابلہ دونوں جانب سے تیز رفتار رہا، لیکن ایسا محسوس ہونے لگا کہ پلڑا نیدرلینڈز کے حق میں جھک رہا ہے، جب کوچ رونالڈ کومان نے ہائیڈریشن بریک کے بعد متعدد تبدیلیاں کرتے ہوئے فارورڈ ووٹ ویگھورسٹ کو میدان میں اتارا۔
ویگھورسٹ نے آتے ہی اثر دکھایا اور ایک لمبی گیند کو ہیڈ کے ذریعے آگے بڑھایا، جس پر کریسینسیو سمر ویل گول کی جانب بڑھے۔ سمر ویل نے گیند کو کراس کیا، جس پر کوڈی گاکپو نے ڈائیو لگا کر گول کر دیا۔
لیورپول کے دفاعی کھلاڑی ورجل فان ڈائیک کی بہترین قیادت میں نیدرلینڈز فتح کے قریب دکھائی دے رہا تھا، لیکن عیسیٰ دیوپ کے آخری لمحات کے ہیڈر نے اس کی امیدوں پر پانی پھیر دیا اور مقابلہ اضافی وقت میں چلا گیا۔
اضافی وقت کے 96ویں منٹ میں مراکش فتح کے انتہائی قریب پہنچ گیا تھا، جب سفیان رحیمی اکیلے گول کی جانب بڑھے، لیکن بارٹ فربروگن نے ناقابلِ یقین سیو کرتے ہوئے یقینی گول روک دیا۔
نیدرلینڈز نے کسی نہ کسی طرح مقابلہ پنالٹی شوٹ آؤٹ تک پہنچا دیا، لیکن اگرچہ مراکش کی پہلی پنالٹی پر نیل العیناوی کی شاٹ کراس بار سے ٹکرا گئی، اس کے باوجود شمالی افریقی ٹیم نے شاندار واپسی کرتے ہوئے آخرکار کامیابی اپنے نام کر لی۔
